Á síðustu árum hafa orðið gífurlegar framfarir í rannsóknum á taugasjúkdómum og þar á meðal rannsóknir á parkinsons. Hefur athygli manna einkum beinst að stofnfrumurannsóknum en með þeirra hjálp vonast menn til að í framtíðinni verði hægt að rækta margar tegundir fruma, þar á meðal taugafrumur sem framleiða dópamín.

Stofnfruma er fruma sem getur gefið af sér allar gerðir vefja líkamans þ.e. getur breyst í hvaða vef sem er í líkamanum.
Samkvæmt grein í morgunblaðinu nýverið kemur fram að lausnin virðist vera í sjónmáli þar sem gerðar hafa verið tilraunir bæði við Harvardháskóla og hjá heilbrigðismálastofnun Bandaríkjanna til að nota ígræddar stofnfrumur úr fósturvísum .
En hvenær þessi aðferð verður prófuð á fólki er annað mál og háð pólitískum dutlungum og siðferðislegum spurningum.
Í Lundi í Svíþjóð eru rannsóknir líka langt á veg komnar og beinast sjónir manna að stofnfrumum - fósturstofnfrumum, taugastofnfrumum, húðstofnfrumum og blóðstofnfrumum sem allar er hægt að nota við lækningu parkinsonssjúkdómsins, en þær hafa bæði jákvæða og neikvæða eiginleika.
Ef notaðar eru stofnfrumur úr manneskjunni sjálfri og hægt væri að nýta þær til að framleiða nýjar dópamínfrumur hafnar líkami viðkomandi þeim ekki. En ef notaðar eru stofnfrumur úr fósturvísum er alltaf hætta á höfnun.