Mynd 6. Langskorin slagæð.
Ef þverskorin slagæð er skoðuð í smásjá má glöggt aðgreina þrjú lög eða hjúpa:
- Innhjúpurinn, tunica intima: Hann er þeirra þynnstur, aðeins eitt lag af þekjufrumum.
- Miðhjúpurinn, tunica media: Hann er langþykkasti hjúpur slagæðaveggjanna. Í honum er teygjanlegur bandvefur og sléttur vöðvavefur og stefna þræðir beggja umhverfis æðina.
- Úthjúpurinn, tunica adventitia: Hann er gerður úr bandvef, sem gerður er úr stífum og teygjanlegum þráðum. Hann er tiltölulega þunnur í slagæðum, en er þykkasta lagið í veggjum bláæða.
Bláæð, venae, er æð sem leiðir blóð frá vefjum aftur til hjartans. Bláæðaveggir eru að jafnaði þynnri en veggir slagæða. Flestar bláæðar sem eru meira en 2 mm í þvermál eru með lokur sem hindra bakflæði blóðsins. Þessum lokum er raðað þannig að blóðið beinist í átt til hjartans, ekki í gagnstæða átt.
Mynd 7. Langskorin bláæð.