Grasagarður Reykjavíkur – Vettvangsferð og verkefnavinna í Nát103

Markmið: Að kynnast og heimsækja Grasagarð Reykjavíkur í Laugardal.

Að vinna verkefni sem tengist plöntum sem þar er að finna.

Fylkingar plönturíkisins eru eftirfarandi: Þörungar, mosar, jafnar, elftingar, burknar, berfrævingar og dulfrævingar.

1) Nokkrar tegundir burkna finnast hér á landi. Sem dæmi má nefna mosaburkna (sjaldgæfur) (Hymenophyllum wilsonii) sem er minnsti burkni landsins. Stóraburkna finnið þið í garðinum. Finnið, skoðið og skráið tegundaheiti hans.

Burknar teljast til svokallaðra gróplantna. Finnið gróin og lýsið því hvar þau eru á plöntunni og rissið upp mynd af þeim.

2) Elftingar eru gróplöntur eins og burknar og þær eru nokkuð algengar um allt land. Þær vaxa í ræktarjörð, úthaga, valllendi og mólendi. Finnið, skoðið og skráið heiti tveggja tegunda elftinga. T.d. klóelfting og mýrelfting

3) Starir eru plöntur sem algengar eru í mýrum og flóum. Mýrastör (Carex nigra) er ein algengasta stör landsins. Finnið og skráið aðra tegund sem tilheyrir sömu ættkvísl. T.d. stinnastör

4) “Göngum við í kringum einiberjarunn, einiberjarunn.....” Einir er eina barrtréð sem vex villt á Íslandi og er nokkuð algengur um allt landi. Þess má geta að einiber voru notuð til lækninga og “þóttu góð við nýrnaveiki, tíðaverkjum, berklum og magasjúkdómum. Á fyrri öldum var reykur af einiberjum látinn leika um sængurkonur til þess að halda djöflinum í hæfilegri fjarlægð”(Ágúst Bjarnason, bls. 256). Finnið, lýsið (með teikningu) og skráið tegundaheiti þessa berfrævings.

5) Öll þekkjum við fífilinn. En skyldi vera til fleiri tegundir af fíflum? T.d. íslandsfífill,

6) Holurtin eða “flugublóm” eins og hún er stundum kölluð vex einkum á melum og er algeng um allt land. Skráið latneskt heiti tegundarinnar.

7) Erlendar, fjölærar plöntur setja mikinn svip á Grasagarðinn. Fjöldi þeirra er yfir 2000. Finnið og skoðið Geum x borisii og lýsið fræjum hennar.

8) Önnur tegund þessara fjölæru planta er Eryngium caucasicus, Fjallasveipþyrnir. Finnið og skoðið. Hvað er sérstakt við laufblöð þessarar plöntu?

9) Kryddjurtir af ýmsum toga þykja okkur eftirsóknarverðar. Nefndu 4 tegundir af kryddjurtum sem við getum ræktað hér á landi. (Ath matjurtagarðurinn). Tilgreinið bæði latnesk og íslensk heiti þessara tegunda.

10) Bygg hefur verið ræktað á Íslandi frá því menn námu hér land. Hvaða hlutar plöntunnar eru notaðir til manneldis?