Markmið

Að nemendur afli sér þekkingar um viðfangsefni tengd vist-og umhverfisfræði.
Að nemendur þjálfist í sjálfstæðum vinnubrögðum við öflun upplýsinga og notkun þeirra við lausn flókinna viðfangsefna. Sjá http://www.pbl.is
Að nemendur þjálfist í framsetningu upplýsinga.
Að nemendur vinni með öðrum.

Viðfangsefnið:

Íbúar og yfirvöld þéttbýlissvæðis nokkurs, eiga við vanda að etja. Lítið hefur verið hugað að umhverfismálum í bæjarfélaginu og nærliggjandi sveitum. Menn hafa treyst á að náttúruöflin feyki úrgangsefnum burt og haft að orði “að lengi taki sjórinn við”.

Í héraðinu er stóriðjur af ýmsu toga og litlar kröfur gerðar um mengunarvarnir. Í sorp-og skólpmálum hefur viðkvæðið verið “að sé vandamálið úr augsýn þá sé það horfið”. En menn búa ekki lengur í paradís..............

1) Haust eitt fór að bera á fiskidauða og vansköpun skeldýra við strendur og auk þess mældust þrávirk lífræn efni í sel og sjófugli.

2) Hlýviðrið undanfarin ár hefur vakið furðu íbúa á þessu landsvæði.

3) Sorp hrúgast upp, skipulögð úrgangslosunarsvæði eru orðin yfirfull og jarðvegsmengun er þó nokkur á nærliggjandi svæðum.

4) Dæmi eru um framandi tegundir bæði á landi og í sjó sem fjölga sér hratt og ganga á aðrar tegundir sem fyrir eru.

5) Sum svæði eru að verða illa farin vegna gróður-og jarðvegseyðingar.

Þið eruð hópur sérfræðinga sem bæjaryfirvöld leita til. Ykkar hlutverk er að greina þessi viðfangsefni og koma með tillögur að lausnum ef einhverjar eru. Hverjar eru t.d. ráðleggingar ykkar til yfirvalda bæjarfélagsins?

Vinnuferlið:

1. tími. Verkefni kynnt Myndið hópa. Hver hópur velur sér eitt af ofangreindum verkefnum. Hugastormun nemenda. Skrifið niður það sem þið vitið um viðfangsefnið. Hvað er í gangi ? Tillögur til úrbóta?

2. tími - Heimildasöfnun – Bókasafn, netið, heimildir í kennslustofu, kennarinn. Reynið að útskýra viðfangsefnið og koma með tillögur til úrbóta

3. tími. Skrifað um efnið og setjið upp á skipulegan hátt. Hugið að gæðum þess sem þið skrifið en ekki magni. Munið að geta heimilda.

4. tími. Niðurstöður kynntar fyrir hinum í hópnum (5-10 mín).

Mat:

Mæting og virkni: (20%)

Kynning (10%)

Efnistök (60%)

Heimildir (10%)