Tungan er flatur, þverrákóttur vöðvi, staðsettur í munnholi. Tungan tengist munnbotninum og nefnist sá staður tungurót. Tungurótin inniheldur taugaknippi, slagæðlinga og vöðvafrumur sem ná í aðra tunguhluta. Innan um þverrákóttu vöðvafrumur tungunnar eru fitukirtlar og munnvatnskirtlar, sem seyta munnvatni og mýkja þannig munnholið svo að fæðan eigi greiðari leið niður í kokið og vélindað. Yfirborð tungunnar er þakið hrjúfri slímhimnu. Bragðlaukarnir eru staðsettir á yfirborði tungunnar (dorsum) en eins og nafnið bendir til þá finnum við bragð þegar fæða snertir bragðlaukana. Neðri hluti tungunnar er fjólublár að lit vegna allra æðanna sem þar eru. Þar er slímhimnan líka slétt og mjúk en ekki hrjúf eins og á efra borði tungunnar. Tungubroddurinn og jaðar tungunnar snerta yfirleitt tennurnar í munni mannsins en tungan hjálpar til við kyngingu og tal og eru það meginhlutverk tungunnar. Tungan hjálpar til við mölun fæðunnar með því að seyta munnvatni og velta fæðumaukinu til og frá í munnholinu. Tungan getur myndað nokkurs konar undirþrýsting í munnholinu sem gerir okkur kleift að sjúga og kyngja. Tungan hjálpar okkur líka við það að tala og án tungunnar væri varla til neitt sem heitir franskur koss. Mörg dýr nota tunguna sem hjálpartæki við snyrtingu, t.d. hundar og kettir. Önnur dýr nota tunguna þegar veiða skal til matar t.d. eðlur og froskar.

Til baka á aðalsíðu

LOL 203, verkefni nemenda vorönn 2000.