Mannslíkaminn er stór og fjölbreytt starfseining sem samanstendur af fjölda líffæra. Hvert líffæri hefur sitt hlutverk og eru þau mis mikilvæg. Án sumra líffæra getum við ekki lifað en önnur eru ekki jafn mikilvæg og getum við lifað án þeirra, án þess að líkamsstarfsemin fari úr skorðum Á ákveðin hátt tengjast þessi líffæri öll innbyrðis og mynda líffærakerfi og saman sjá þau um að halda líkamanum gangandi. Þau gera manninum kleift að hreyfa sig, anda, neyta fæðu og fjöldamargs annars.
Fæðan er okkur ómissandi því að úr henni fáum við þá orku og þau næringarefni sem okkur eru nauðsynleg. Meltingarfærin sjá um að koma þessum efnum úr fæðunni og í blóðrásina. Næringarefnin berast svo með blóðrásarkerfinu um líkaman til þeirra líffæra og frumna þar sem þeirra er þörf.
Lifrin er eitt af þeim líffærum sem skipar veigamikið hlutverk í efnabúskap líkamans og án hennar getum við ekki lifað. Hún er stærsta afmarkaða líffæri mannsins og er hún forðabúr gnótt næringarefna. Lifrin sinnir flóknum og margvíslegum störfum og stjórnar að nokkru leyti efnaskiptum líkamans. Án efa er ekkert annað líffæri í manninum sem gegnir svo mörgum og mismunandi hlutverkum og það gerir lifrina svo sérstaka eins og hún er.